మారనున్న ధమ్మపేట సెంటర్, రోడ్డు రూపురేఖలు.ఎమ్మెల్యే కూనంనేని కృషితో ఫోర్ లైన్ రోడ్డు మంజూరు.
తెలుగు వెలుగు టీవీ - వార్తలు / కొత్తగూడెం : ఎమ్మెల్యే కూనంనేని కృషితో ఫోర్ లైన్ రోడ్డు మంజూరు. రూ.14 కోట్లతో ధమ్మపేట రోడ్డు అభివృద్ధి. నేడు శంకుస్థాపన చేయనున్న మంత్రి, ఎంపీ, ఎమ్మెల్యే.మారనున్న ధమ్మపేట సెంటర్, రోడ్డు రూపురేఖలు. కొత్తగూడెం నియోజకవర్గ సమగ్ర అభివృద్ధే ధ్యేయంగా స్థానిక శాసనసభ సభ్యులు కూనంనేని సాంబశివరావు ప్రత్యేక చొరవతో మరో ప్రతిష్టాత్మక ప్రాజెక్టు సాకారమైంది. నియోజకవర్గ పరిధిలోని ప్రయాణ సౌకర్యాలను మెరుగుపరచడంతో పాటు, ట్రాఫిక్ సమస్యలకు శాశ్వత పరిష్కారం చూపే దిశగా ఆయన చేసిన కృషితో ధమ్మమేట రోడ్డు అభివృద్ధికి మోక్షం లభించింది. దమ్మపేట సెంటర్ నుంచి కుంటినాగులగూడెం వరకు సుమారు రెండున్నర కిలోమీటర్ల మేర అధునాతన ఫోర్ లైన్ (నాలుగు వరుసల) రహదారి నిర్మాణానికి ప్రభుత్వం నుంచి అనుమతులు లభించాయి. ఈ మెగా రోడ్డు నిర్మాణ పనుల కోసం ప్రభుత్వం రూ.14 కోట్ల భారీ నిధులను మంజూరు చేసింది. ఈ రహదారి అందుబాటులోకి వస్తే స్థానిక ప్రజలతో పాటు, అశ్వారావుపేట వైపు రాకపోకలు సాగించే వాహనదారుల ప్రయాణ కష్టాలు తీరనున్నాయి. ఎంతో కాలంగా ఎదురుచూస్తున్న ఈ ప్రతిష్టాత్మక ఫోర్ లైన్ రోడ్డు నిర్మాణ పనులకు అధికారికంగా శంకుస్థాపన ముహూర్తం ఖరారైంది. గురువారం నాడు జరిగే ప్రత్యేక కార్యక్రమంలో రాష్ట్ర రెవెన్యూ, గృహనిర్మాణ శాఖల మంత్రి పొంగులేటి శ్రీనివాసరెడ్డి ముఖ్య అతిథిగా హాజరుకానున్నారు. వారితో పాటు ఖమ్మం పార్లమెంట్ సభ్యులు రామసహాయం రఘురాం రెడ్డి, స్థానిక ఎమ్మెల్యే కూనంనేని సాంబశివరావు చేతులమీదుగా ఈ పనులకు ఘనంగా శంకుస్థాపన నిర్వహించబోతున్నారు. నియోజకవర్గంలో రోడ్లు, డ్రెయిన్లు, వంతెనల నిర్మాణంతో పాటు మౌలిక వసతుల కల్పనకు ఎమ్మెల్యే కూనంనేని నిరంతరం శ్రమిస్తున్నారని ఈ నిధుల మంజూరు ద్వారా మరోసారి నిరూపితమైంది. ప్రజాపక్షంగా ఉంటూ నియోజకవర్గాన్ని ప్రగతి పథంలో నడిపించేందుకు కూనంనేని సాంబశివరావు గారు తెస్తున్న నిధులు, చేస్తున్న అభివృద్ధి పట్ల స్థానిక ప్రజలు, ప్రజాప్రతినిధులు హర్షం వ్యక్తం చేస్తున్నారు. ఈ శంకుస్థాపన కార్యక్రమాన్ని విజయవంతం చేయాలని నియోజకవర్గ నాయకులు కోరారు.
Admin
తెలుగు వెలుగు టీవీ
మరిన్ని వార్తలు
Developed By :
