ఆస్పత్రిలో తాగునీటి సమస్యకు పరిష్కారం. రూ.2.50 లక్షలతో కొత్త బోరు ఏర్పాటు. మౌలిక వసతుల కల్పనపై ప్రత్యేక దృష్టి. కొత్తగూడెం నగర మేయర్ మూడ్ గణేష్.
తెలుగు వెలుగు టీవీ - వార్తలు / కొత్తగూడెం : ప్రభుత్వ ఆస్పత్రుల్లో తాగునీటి సమస్య తలెత్తకుండా శాశ్వత పరిష్కారం చూపడమే లక్ష్యమని కొత్తగూడెం నగర మేయర్ మూడ్ గణేష్ అన్నారు. కొత్తగూడెం ప్రభుత్వ జనరల్ హాస్పిటల్ (జీజీహెచ్) ఆవరణలో కొత్తగూడెం మున్సిపల్ కార్పొరేషన్ ఆధ్వర్యంలో సుమారు రూ.2.50 లక్షల సాధారణ నిధులతో చేపట్టిన నీటి బోర్ పనులను శనివారం ఆయన స్వయంగా పరిశీలించారు. ఈ సందర్భంగా బోరు ఏర్పాటు పనులు విజయవంతంగా పూర్తయి, విస్తారంగా భూగర్భ జలాలు రావడంతో ఆయన సంతృప్తి వ్యక్తం చేశారు. అనంతరం మేయర్ మాట్లాడుతూ.. జిల్లా నలుమూలల నుంచి నిత్యం వందలాది మంది రోగులు, సహాయకులు చికిత్స నిమిత్తం జనరల్ ఆస్పత్రికి వస్తుంటారని తెలిపారు. గత కొద్ది రోజులుగా ఇక్కడ తీవ్ర తాగునీటి ఎద్దడి ఏర్పడి రోగులు, వైద్యులు, పారామెడికల్ సిబ్బంది తీవ్ర అసౌకర్యానికి గురవుతున్న విషయాన్ని పాలకవర్గం గుర్తించి వెంటనే స్పందించిందని పేర్కొన్నారు. కార్పొరేషన్ సాధారణ నిధుల నుంచి నిధులు కేటాయించి అత్యవసరంగా బోరు వేయించామని, విస్తారంగా నీరు పడటంతో ఆస్పత్రిలో తీవ్ర నీటి కొరతకు తెరపడిందని చెప్పారు. ప్రజారోగ్య కేంద్రాల్లో కనీస మౌలిక సదుపాయాల కల్పనకు ఎల్లప్పుడూ ప్రాధాన్యత ఉంటుందని, భవిష్యత్తులో కూడా కార్పొరేషన్ పరిధిలోని ప్రజోపయోగ కేంద్రాల్లో సమస్యలు తలెత్తకుండా తగిన చర్యలు తీసుకుంటామని ఆయన స్పష్టం చేశారు. ఈ కార్యక్రమంలో మున్సిపల్ అధికారులు, ఇంజనీరింగ్ సిబ్బంది, ఆస్పత్రి వైద్య సిబ్బంది తదితరులు పాల్గొన్నారు.
Admin
తెలుగు వెలుగు టీవీ
మరిన్ని వార్తలు
Developed By :
