ఏఐటీయూసీ ఆధ్వర్యంలో ఘనంగా 106వ ఆవిర్భావ వేడుకలు
తెలుగు వెలుగు టీవీ - వార్తలు / కొత్తగూడెం : శ్రామిక వర్గ పోరాటాలకు ఏఐటీయూసీ జెండానే దిక్చూచి ఎర్రజెండా నీడలోనే శ్రామికులకు రక్షణ కార్పొరేట్ కొమ్ముకాసే విధానాలు తిప్పికొట్టాలి చారిత్రక హక్కుల సాధన, పరిరక్షణకోసం ఐక్యంగా ఉద్యమిద్దాం ఐక్య పోరాటాలతోనే కార్మిక లోకానికి మనుగడ : సిపిఐ జిల్లా కార్యదర్శి ఎస్.కె. సాబీర్ పాషా శ్రామిక వర్గ పోరాటాలకు ఏఐటీయూసీ జెండానే దిక్చూచి అని, శ్రామిక పక్షాన నిలబడి ఎరుపెక్కించిన ఆ ఎర్రజెండా నీడలోనే కార్మికులకు అసలైన రక్షణ లభిస్తుందని సిపిఐ జిల్లా కార్యదర్శి, ఏఐటీయూసీ జిల్లా గౌరవ అధ్యక్షులు ఎస్.కె. సాబీర్ పాషా అన్నారు. శనివారం పట్టణంలోని పలు కార్మిక కేంద్రాలు, హమాలీ అడ్డాల్లో ఏఐటీయూసీ వ్యవస్థాపక దినోత్సవాన్ని పురస్కరించుకుని సంఘ పతాకాలను ఆయన ఆవిష్కరించారు. ఈ సందర్భంగా కార్మికులను ఉద్దేశించి ఆయన మాట్లాడుతూ.. ఒక శతాబ్దానికి పైగా దేశ ఆర్థిక రంగాన్ని ముందుకు నడిపిస్తున్న శ్రామికుల సంక్షేమాన్ని కేంద్ర పాలకులు పూర్తిగా గాలికొదిలేశారని విమర్శించారు. ఎన్నో త్యాగాలు, సమ్మెలతో సాధించుకున్న 44 కార్మిక చట్టాలను రద్దు చేసి, వాటి స్థానంలో 4 లేబర్ కోడ్లను తీసుకురావడం కార్పొరేట్ శక్తులకు ఊడిగం చేయడమేనని దుయ్యబట్టారు. సంఘటిత, అసంఘటిత రంగాలనే తేడా లేకుండా కోట్లాది మంది హమాలీలు, ఆటో కార్మికులు, ఇతర శ్రామికుల జీవితాలను పాలకుల విధానాలు తీవ్ర సంక్షోభంలోకి నెట్టేస్తున్నాయని ఆవేదన వ్యక్తం చేశారు. ప్రభుత్వ రంగాన్ని ప్రైవేటు శక్తులకు కారుచౌకగా కట్టబెట్టే కుట్రలను తిప్పికొట్టాల్సిన బాధ్యత శ్రామిక లోకంపై ఉందన్నారు. కార్మికుల న్యాయమైన హక్కుల సాధనకు ఏఐటీయూసీ ఎల్లప్పుడూ అండగా ఉండి రాజీలేని ఉద్యమాలను నడుపుతుందని స్పష్టం చేశారు. కార్మిక వర్గ ఐక్యతను చాటిచెబుతూ రాబోయే రోజుల్లో దేశవ్యాప్తంగా పోరాటాలను ఉధృతం చేయాల్సిన అవసరాన్ని గుర్తుచేశారు. కార్యక్రమాల్లో ఏఐటీయూసీ జిల్లా అధ్యక్ష, కార్యదర్శులు కంచర్ల జమలయ్య, నరాటి ప్రసాద్, గెడ్డాడు నగేష్, వంగ వెంకట్, గనగళ్ల వీరాస్వామి, రమణమూర్తి, వాసిరెడ్డి మురళి, భూక్యా శ్రీనివాస్, మండల రాజేశ్వరరావు, లక్ష్మీనారాయణ, మాతంగి లింగయ్య, ఆరెల్లి కృష్ణ, అబ్బులు, నాగేశ్వరరావు తదితరులు పాల్గొన్నారు.
Admin
తెలుగు వెలుగు టీవీ
మరిన్ని వార్తలు
Developed By :
