అనారోగ్య కార్మికులకు అన్యాయం చేయొద్దు : ఏఐటీయూసీ ప్రధాన కార్యదర్శి కొరిమి రాజ్ కుమార్
తెలుగు వెలుగు టీవీ - వార్తలు / కొత్తగూడెం : 1,800 మంది కార్మికులకు అన్‌ఫిట్ కోసం ఎదురుచూపులు. రీ-మెడికల్ బోర్డు ఏర్పాటు చేయాలి: ఏఐటీయూసీ ప్రధాన కార్యదర్శి కొరిమి రాజ్ కుమార్. సింగరేణి సంస్థలో నిర్వహిస్తున్న కార్పొరేట్ మెడికల్ బోర్డు విధానాన్ని యాజమాన్యం పునఃసమీక్షించాలని ఏఐటీయూసీ ప్రధాన కార్యదర్శి కొరిమి రాజ్ కుమార్ డిమాండ్ చేశారు. తీవ్ర అనారోగ్య సమస్యలతో విధులు నిర్వహించలేని కార్మికులకు వైద్యపరమైన న్యాయం చేయాలని బుధవారం ఒక ప్రకటనలో ఆయన కోరారు.అన్‌ఫిట్ నిర్ధారణ ప్రక్రియలో పారదర్శకత పాటిస్తూ, అర్హులైన కార్మికులకు నిబంధనల ప్రకారం న్యాయం చేయాలని బుధవారం విడుదల చేసిన ప్రకటనలో పేర్కొన్నారు.సింగరేణిలో ఇటీవల నిర్వహించిన కార్పొరేట్ మెడికల్ బోర్డుల్లో అన్‌ఫిట్‌గా నిర్ధారణ అవుతున్న కార్మికుల సంఖ్య తక్కువగా ఉండటం ఆందోళన కలిగిస్తోందని కొరిమి రాజ్ కుమార్ పేర్కొన్నారు. గత మెడికల్ బోర్డుల్లో వరుసగా సుమారు 4 శాతం, 14 శాతం, 10 శాతం మాత్రమే కార్మికులు అన్‌ఫిట్‌గా నిర్ధారణ అయిన పరిస్థితిపై యాజమాన్యం సమగ్ర సమీక్ష నిర్వహించాలని కోరారు.గుండె సంబంధిత సమస్యలతో స్టెంట్లు వేయించుకున్న కార్మికులు, కిడ్నీ వ్యాధులతో బాధపడుతున్న వారు, శారీరకంగా కఠినమైన విధులు నిర్వహించలేని పరిస్థితిలో ఉన్న కార్మికులు సైతం అన్‌ఫిట్‌గా నిర్ధారణ కాకపోవడం విచారకరమన్నారు.కార్మికుల వాస్తవ ఆరోగ్య పరిస్థితిని పరిగణనలోకి తీసుకోకుండా నిర్ణయాలు తీసుకోవడం వల్ల వారు తీవ్ర ఇబ్బందులు ఎదుర్కొంటున్నారని ఆవేదన వ్యక్తం చేశారు.ఇప్పటికే నాలుగుసార్లు మెడికల్ బోర్డులు నిర్వహించిన నేపథ్యంలో, తీవ్ర అనారోగ్య సమస్యలతో విధులు నిర్వహించలేని కార్మికులను గుర్తించేందుకు ప్రత్యేకంగా రీ-మెడికల్ బోర్డు ఏర్పాటు చేయాలని డిమాండ్ చేశారు. మరోసారి సమగ్ర వైద్య పరీక్షలు నిర్వహించి, వైద్యపరంగా అర్హులైన వారిని నిబంధనల ప్రకారం అన్‌ఫిట్‌గా నిర్ధారించాలని కోరారు.మెడికల్ బోర్డు నిర్ణయాలు కేవలం హైదరాబాద్ నుంచి వచ్చే వైద్యుల అభిప్రాయాలకే పరిమితం కాకూడదని కొరిమి రాజ్ కుమార్ సూచించారు. కార్మికుల వాస్తవ ఆరోగ్య పరిస్థితి, వారు నిర్వహిస్తున్న విధుల స్వభావం, శారీరక సామర్థ్యం, వైద్య నివేదికలు, దీర్ఘకాలిక అనారోగ్య సమస్యలను సమగ్రంగా పరిశీలించాలన్నారు.మెడికల్ బోర్డుల నిర్వహణలో ఏకరీతి విధానం, పారదర్శకత, వైద్యపరమైన న్యాయం ఉండాలని స్పష్టం చేశారు.ప్రస్తుతం సుమారు 1,800 మంది కార్మికులు అన్‌ఫిట్ కోసం ఎదురుచూస్తున్నారని ఏఐటీయూసీ పేర్కొంది. వీరిలో అనేక మంది అనారోగ్య కారణాలతో సాధారణ విధులు నిర్వహించలేక, కుటుంబాలను పోషించడంలో తీవ్ర ఇబ్బందులు ఎదుర్కొంటున్నారని తెలిపింది. గతంలో అమలు చేసిన మెడికల్ బోర్డు విధానాలను పునఃపరిశీలించి, అర్హులైన ప్రతి కార్మికుడికి నిబంధనల ప్రకారం అన్‌ఫిట్ సర్టిఫికేషన్ లభించేలా చర్యలు తీసుకోవాలని సింగరేణి యాజమాన్యాన్ని కొరిమి రాజ్ కుమార్ కోరారు.
Admin
తెలుగు వెలుగు టీవీ
మరిన్ని వార్తలు
Developed By :
