వరంగల్ కమిషనరేట్‌లో ముగిసిన భద్రాద్రి జోనల్ పోలీస్ డ్యూటీ మీట్
తెలుగు వెలుగు టీవీ - వార్తలు / కొత్తగూడెం : వరంగల్ కమిషనరేట్‌లో ముగిసిన భద్రాద్రి జోనల్ పోలీస్ డ్యూటీ మీట్ గత మూడు రోజులుగా వరంగల్ పోలీస్ కమిషనరేట్ ఆధ్వర్యంలో మామునూరు పోలీస్ శిక్షణ కేంద్రంలో నిర్వహించిన భద్రాద్రి జోనల్ పోలీస్ డ్యూటీ మీట్ గురువారం ఘనంగా ముగిసింది. ఈ డ్యూటీ మీట్‌లో జోనల్ పరిధిలోని వరంగల్, ఖమ్మం పోలీస్ కమిషనరేట్లతో పాటు మహబూబాబాద్, భద్రాద్రి కొత్తగూడెం జిల్లాలకు చెందిన పోలీస్ అధికారులు కంప్యూటర్ పరిజ్ఞానం, ఫోరెన్సిక్ సైన్స్, ఫింగర్ ప్రింట్స్ లిఫ్టింగ్ అండ్ ప్యాకింగ్, బాంబ్ డిస్పోజల్, డాగ్ స్క్వాడ్, ప్రొఫెషనల్ ఫోటోగ్రఫీ మరియు వీడియోగ్రఫీ విభాగాల్లో పోటీపడ్డారు. ఈ పోటీల్లో ప్రతిభ కనబరిచిన పోలీస్ అధికారులకు వరంగల్ పోలీస్ కమిషనర్ ఎన్. శ్వేత, ఐపీఎస్ చేతుల మీదుగా పతకాలు అందజేశారు. వరంగల్ పోలీస్ కమిషనరేట్ విభాగం 13 గోల్డ్ మెడల్స్‌తో కలిపి మొత్తం 28 పతకాలను సాధించింది. అలాగే భద్రాద్రి కొత్తగూడెం 12, మహబూబాబాద్ జిల్లా 13, ఖమ్మం 9 పతకాలను సాధించాయి. ఇందులో ప్రతిభ కనబరిచిన పోలీస్ అధికారులు త్వరలో మల్కాజిగిరి కమిషనరేట్‌లో జరగనున్న రాష్ట్రస్థాయి పోలీస్ డ్యూటీ మీట్‌లో పాల్గొంటారు. ఈ సందర్భంగా పోలీస్ కమిషనర్ మాట్లాడుతూ, ఇలాంటి డ్యూటీ మీట్‌ల ద్వారా వృత్తి నైపుణ్యాన్ని పెంపొందించుకోవచ్చని తెలిపారు. కఠోర సాధన ద్వారా వృత్తి నైపుణ్యంతో పాటు అన్ని రంగాల్లో ప్రతిభ కనబరచవచ్చని, ముఖ్యంగా వృత్తి నైపుణ్యం సాధించడం ద్వారా విధి నిర్వహణలో ఎదురయ్యే పని ఒత్తిళ్లను అధిగమించవచ్చని పేర్కొన్నారు. జోనల్ స్థాయిలో కనబరిచిన ప్రతిభను రాష్ట్ర, జాతీయ స్థాయి పోటీల్లో కూడా కొనసాగించాలని పోలీస్ అధికారులకు సూచించారు. విజయవంతంగా ఈ పోటీలను నిర్వహించడంలో కృషి చేసిన పోలీస్ అధికారులు, సిబ్బందిని పోలీస్ కమిషనర్ అభినందించారు. ఈ కార్యక్రమంలో అదనపు డీసీపీలు శ్రీనివాస్, బాలస్వామి, ఏసీపీలు సురేంద్ర, డీఎస్పీలు శ్రీనివాస్, సాంబరాజు, ఆర్‌ఐలు సతీష్, ఇన్‌స్పెక్టర్లు క్రాంతికుమార్, విశ్వేశ్వర్, శ్రీనివాస్, ఎస్ఐ విజయ్ కుమార్, ఆర్‌ఎస్‌ఐ శ్రవణ్ కుమార్‌తో పాటు ఇతర పోలీస్ సిబ్బంది పాల్గొన్నారు
Admin
తెలుగు వెలుగు టీవీ
మరిన్ని వార్తలు
Developed By :
