నాటి అమరుల త్యాగాలతోనే స్వేచ్ఛ : సిపిఐ జిల్లా కార్యదర్శి ఎస్ కె సాబీర్ పాషా
తెలుగు వెలుగు టీవీ - వార్తలు / కొత్తగూడెం : భూమి కోసం ఐలమ్మ చేసిన పోరాటం స్ఫూర్తిదాయకం దోపిడీపై తిరుగుబాటు స్ఫూర్తిని నేర్పిన సాయుధ పోరాట యోధులు : సిపిఐ జిల్లా కార్యదర్శి ఎస్ కె సాబీర్ పాషా నాటి సాయుధ పోరాట అమరవీరుల త్యాగాల పునాదులపైనే నేటి స్వేచ్ఛా తెలంగాణ ఆవిష్కృతమైందని సిపిఐ జిల్లా కార్యదర్శి ఎస్ కె సాబీర్ పాషా స్పష్టం చేశారు. వీరనారి చాకలి ఐలమ్మ జయంతిని పురస్కరించుకుని శనివారం కొత్తగూడెం బస్టాండ్ సెంటర్ లో ప్రత్యేక కార్యక్రమం నిర్వహించారు. ఈ సందర్భంగా ఐలమ్మ చిత్రపటానికి పూలమాలలు వేసి ఘనంగా నివాళులర్పించారు. అనంతరం ఆయన మాట్లాడుతూ.. దొరల గడీల అణచివేతపై, భూస్వామ్య దోపిడీపై ఐలమ్మ సాగించిన వీరోచిత పోరాటం తరతరాలకు ఆదర్శప్రాయమని కొనియాడారు. నాడు కమ్యూనిస్టు పార్టీ అందించిన ఎర్రజెండా అండతోనే సామాన్య మహిళ సైతం తుపాకీ పట్టి నిజాం గుండాలను ఎదిరించిందని గుర్తుచేశారు. భూమి కోసం, భుక్తి కోసం, విముక్తి కోసం సాగిన తెలంగాణ సాయుధ పోరాట చరిత్రను పాలకులు మరుగున పరిచే ప్రయత్నం చేస్తున్నారని విమర్శించారు. నేటికీ పేదలకు భూమి, గూడు అందని ద్రాక్షగానే మిగిలాయని, కార్పొరేట్ శక్తుల దోపిడీ రోజురోజుకూ పెరిగిపోతోందని ఆందోళన వ్యక్తం చేశారు. నాటి అమరుల ఆశయాల సాధనకు పీడిత వర్గాలు మరోసారి పోరాట బాట పట్టాలని పిలుపునిచ్చారు. ప్రజా సమస్యల పరిష్కారం కోసం ఐలమ్మ పోరాట పటిమను స్ఫూర్తిగా తీసుకుని ఐక్య ఉద్యమాలను నిర్మిస్తామని ఆయన పేర్కొన్నారు. కార్యక్రమంలో కార్పొరేషన్ మేయర్ మూడ్ గణేష్, నాయకులు నేరెళ్ల రమేష్, బోయిన విజయ్ కుమార్, ధనరాజ్, అన్నం లక్ష్మీనారాయణ, సుంకర అజిత్, భూస రాజు, చింతాల రాజు, వసంత రావు తదితరులు పాల్గొన్నారు.
Admin
తెలుగు వెలుగు టీవీ
మరిన్ని వార్తలు
Developed By :
