కొత్తగూడెం ఏరియా భవిష్యత్తును కాపాడాలి.ఖాళీల భర్తీ, సర్ఫస్ కన్వర్షన్‌ వేగవంతం చేయాలి. ఏఐటీయూసీ అదనపు ప్రధాన కార్యదర్శి మిరియాల రంగయ్య
తెలుగు వెలుగు టీవీ - వార్తలు / కొత్తగూడెం : కొత్తగూడెం ఏరియా భవిష్యత్తును కాపాడాలి.ఖాళీల భర్తీ, సర్ఫస్ కన్వర్షన్‌ వేగవంతం చేయాలి ఏఐటీయూసీ అదనపు ప్రధాన కార్యదర్శి మిరియాల రంగయ్య డిమాండ్. సింగరేణి కొత్తగూడెం ఏరియాలో ఖాళీగా ఉన్న పోస్టులను వెంటనే భర్తీ చేయడంతోపాటు, కార్మికుల సమస్యలను పరిష్కరించి ఏరియా భవిష్యత్తుకు భరోసా కల్పించాలని ఏఐటీయూసీ అదనపు ప్రధాన కార్యదర్శి మిరియాల రంగయ్య డిమాండ్ చేశారు. ఆదివారం సాయంత్రం కొత్తగూడెంలోని శేషగిరి భవన్లో నిర్వహించిన ఏఐటీయూసీ కొత్తగూడెం ఏరియా కార్యవర్గ సమావేశంలో ఆయన మాట్లాడారు. వీకే కోల్‌మైన్‌లో పర్మినెంట్‌ కార్మికులతోనే బొగ్గు ఉత్పత్తి చేపట్టాలని, కార్మికుల హక్కులకు విరుద్ధంగా వ్యవహరిస్తే ఉద్యమం చేపడతామని యాజమాన్యాన్ని హెచ్చరించారు.పీవీకే-5 భూగర్భ గనిలో విధులు నిర్వహిస్తున్న జనరల్ అసిస్టెంట్ల సర్ఫస్ కన్వర్షన్‌ ప్రక్రియను పెండింగ్లో పెట్టడం సరికాదని రంగయ్య అన్నారు. సీనియారిటీ ప్రకారం కన్వర్షన్‌ ప్రక్రియను త్వరితగతిన పూర్తి చేసి అర్హులైన కార్మికులకు న్యాయం చేయాలని డిమాండ్ చేశారు. ఏరియాలోని అన్ని సబ్‌కమిటీలను ఏర్పాటు చేసి కార్మికుల సమస్యలను గుర్తించి పరిష్కరించేందుకు యాజమాన్యం చర్యలు తీసుకోవాలని సూచించారు.కొత్తగూడెం ఏరియా భవిష్యత్తు ప్రశ్నార్థకంగా మారకుండా నూతన గనుల ఏర్పాటుపై యాజమాన్యం ప్రత్యేక దృష్టి సారించాలని రంగయ్య కోరారు.పెనగడప సమీపంలోని రాంపురం వద్ద ఇప్పటికే సర్వే నిర్వహించిన ప్రాంతంలో గని ఏర్పాటుకు చర్యలు తీసుకోవాలని సూచించారు. సుమారు 300 అడుగుల లోతులో ఉన్న ఈ ప్రాంతం కోల్ గ్యాసిఫికేషన్‌కు అనుకూలంగా ఉందని పేర్కొంటూ, అక్కడ గనిని ప్రారంభించి ఏరియా భవిష్యత్తును కాపాడాలని కోరారు.అనిశెట్టిపల్లి, పునుకుదుచిలుక ప్రాంతాల్లోని బొగ్గు నిల్వలను సింగరేణి సంస్థ వెంటనే టేకప్‌ చేసి స్థానిక నిరుద్యోగులకు ఉద్యోగావకాశాలు కల్పించాలని డిమాండ్ చేశారు.కార్మిక సంక్షేమానికి ప్రాధాన్యమిస్తూ కొత్తగూడెం ఏరియాలోనూ నెహ్రూ కాలనీల తరహాలో నివాస కాలనీలు నిర్మించాలని రంగయ్య కోరారు. కార్మికులకు సొంతింటి సౌకర్యం కల్పించడంతోపాటు ఖాళీల భర్తీ, ఉద్యోగ భద్రత, గనుల అభివృద్ధిపై యాజమాన్యం సమగ్ర కార్యాచరణ రూపొందించాలని సూచించారు.సమ్మె నోటీసుకు సంబంధించి ఆర్‌ఎల్‌సీ సమక్షంలో జరిగిన చర్చల్లో అంగీకరించిన 24 డిమాండ్లను యాజమాన్యం త్వరితగతిన అమలు చేయాలని ఏరియా కార్యవర్గ సమావేశం డిమాండ్ చేశారు.కార్మిక సమస్యల పరిష్కారంలో జాప్యం చేస్తే యాజమాన్యానికి వ్యతిరేకంగా ఉద్యమాన్ని చేపడతామని నాయకులు హెచ్చరించారు.ఈ సమావేశంలో ఏఐటీయూసీ కేంద్ర ప్రచార కార్యదర్శి వీరస్వామి, బ్రాంచ్ కార్యదర్శి జక్కుల గట్టయ్య, ఉపాధ్యక్షుడు కత్తర్ల రాములు, ఆఫీస్ బేరర్లు సందబోయిన శ్రీనివాస్, ఎస్. నాగేశ్వరరావు, హుమాయూన్‌, హీరాలాల్‌, గుమ్మడి వీరయ్య, కుర్ర రమేష్, పిట్ కార్యదర్శులు భూక్య రమేష్, మధు కృష్ణ, కమల్‌, మెంగన్‌ రవి, సురేందర్‌, సీనియర్ నాయకులు బండారి మల్లయ్య, మండల రాజేశ్వరరావు, కోటి, సవాటీ స్వామి, రమేష్ తదితరులు పాల్గొన్నారు.
Admin
తెలుగు వెలుగు టీవీ
మరిన్ని వార్తలు
Developed By :
