రోడ్డు ప్రమాడానికి గురైన మిత్రుడికి ఆర్ధికసహాయం చేసిన స్నేహితులు
తెలుగు వెలుగు టీవీ - వార్తలు / జూలూరుపాడు : చదువుకునే రోజుల్లో పుస్తకాలు పంచుకున్న స్నేహం, కష్టకాలంలో కన్నీళ్లు తుడిచే బంధంగా మారింది. గత వారం కల్లూరు షుగర్ ఫ్యాక్టరీ వద్ద జరిగిన ఘోర రోడ్డు ప్రమాదంలో గాయపడిన తమ చిన్ననాటి మిత్రుడు గార్లపాటి నరసింహారావు (GNR) కు, 10వ తరగతి 1997- 1998 బ్యాచ్ సహచరులు ప్రేమతో అండగా నిలిచి మానవత్వాన్ని చాటారు. భద్రాద్రికొత్తగూడెం జిల్లా జూలూరుపాడు మండలం చిన్న హరిజనవాడకు చెందిన గార్లపాటి నరసింహారావు ద్విచక్ర వాహనంపై విజయవాడ వెళ్లి వస్తుండగా, కల్లూరు షుగర్ ఫ్యాక్టరీ సమీపంలో టాటా ఏస్ వాహనం ఢీకొట్టింది. తీవ్రంగా గాయపడిన నరసింహారావును 108 వాహనంలో ఖమ్మం ప్రభుత్వ ఆసుపత్రికి తరలించారు. విషయం తెలుసుకున్న మిత్రబృందం వెంటనే 10వ తరగతి వాట్సాప్ గ్రూప్ ఒక్కటైంది. "మనోడు కిందపడితే మనం చూస్తూ ఉండలేం" అంటూ ఒక్కొక్కరూ తమకు తోచిన సాయం చేశారు. ఎవరికీ చెప్పకుండా, ఎలాంటి హంగూ ఆర్భాటం లేకుండా కేవలం 24 గంటల్లోనే రూ,94,000 జమ చేశారు. ఈ మొత్తాన్ని మిత్రులందరూ కలిసి ఆసుపత్రిలో చికిత్స పొంది ఇంటివద్ద విశ్రాంతి తీసుకుంటున్న నరసింహారావుకు స్వయంగా అందజేశారు. "డబ్బు ఇవ్వడం కాదు, 'మేమున్నాం' అనే ధైర్యం ఇవ్వడం ముఖ్యం" అని మిత్రబృందం తెలిపింది. బాల్యంలో కలిసి తిన్న త్రాగిన గోళీ సోడా రుచి, కలిసి కొట్టిన ఆడిన ఆటల గాయాలు ఇప్పటికీ మధురమేనని, ఆ స్నేహమే ఇప్పుడు ఆపదలో ఆదుకునేలా చేసిందని వారు భావోద్వేగానికి గురయ్యారు. స్నేహానికి వయసుతో పనిలేదని, ఆపదలో ఆదుకునే మనసుండాలని నిరూపించిన ఈ మిత్రులను గ్రామస్తులు, కుటుంబ సభ్యులు అభినందిస్తున్నారు. నరసింహారావు త్వరగా కోలుకొని మళ్లీ మామూలు మనిషి కావాలని, మరలా అందరితో కలిసి నవ్వాలని మిత్రబృందం మనసారా కోరుకుంటోంది ఈ కార్యక్రమంలో నేలాల చక్రవర్తి, నేలాల నరసింహారావు, పూర్ణకంటి నరసింహారావు, చాపల మడుగు నరసింహారావు, ఇల్లంగి రాంబాబు, పురస్తతపురపు రామకృష్ణ, ఎలబాక శంకరాచారి, ఉసికల నరసింహరావు, తదితరులు పాల్గొన్నారు.
Admin
తెలుగు వెలుగు టీవీ
మరిన్ని వార్తలు
Developed By :
