కొమరం భీమ్ వర్ధంతి సందర్భంగా ఘన నివాళులు
తెలుగు వెలుగు టీవీ - వార్తలు / జూలూరుపాడు : ఆదివాసీ హక్కుల సాధన కోసం పోరాడిన వీరుడు కొమరం భీమ్ ఆశయాలను కొనసాగిస్తూ, గిరిజనుల హక్కుల పరిరక్షణతో పాటు మండల అభివృద్ధికి కృషి చేస్తామని కొమరం భీమ్ ఫౌండేషన్ నాయకులు పేర్కొన్నారు. భద్రాద్రి కొత్తగూడెం జిల్లా జూలూరుపాడు మండలంలో కొమరం భీమ్ ఫౌండేషన్ మండల కమిటీ ఆధ్వర్యంలో సోమవారం కొమరం భీమ్ వర్ధంతి కార్యక్రమాన్ని ఘనంగా నిర్వహించారు. ఈ సందర్భంగా వివిధ గ్రామాల నుంచి వచ్చిన ఆదివాసీ నాయకులు ఆయన చిత్రపటానికి నివాళులర్పించి, ఆయన పోరాటాలను స్మరించుకున్నారు. ఈ సందర్భంగా ఆదివాసీ నాయకులు కాలం నర్సింహారావు మాట్లాడుతూ, ఆదివాసీల హక్కులు, ఆత్మగౌరవం, అటవీ భూములపై హక్కుల సాధన కోసం కొమరం భీమ్ చేసిన పోరాటం నేటి తరానికి స్ఫూర్తిదాయకమన్నారు. ఆయన ఆశయాలకు అనుగుణంగా ఆదివాసీ సమాజం విద్య, వైద్యం, ఉపాధి, సామాజిక అభివృద్ధి రంగాల్లో ముందుకు సాగాలని పిలుపునిచ్చారు. ఫౌండేషన్ మండల కమిటీ ప్రతినిధి సొడె శ్రీరామ్ మాట్లాడుతూ, మండల కేంద్రంలో ప్రజలు ఎదుర్కొంటున్న సమస్యలను పరిష్కరించేందుకు ప్రభుత్వం, సంబంధిత అధికారులు తక్షణ చర్యలు తీసుకోవాలని డిమాండ్ చేశారు. ప్రజల రవాణా సౌకర్యార్థం బస్‌స్టాండ్ నిర్మించాలని, విద్యార్థుల భవిష్యత్తును దృష్టిలో ఉంచుకొని ప్రభుత్వ జూనియర్ కళాశాలను ఏర్పాటు చేయాలని కోరారు. అలాగే ప్రజల అవసరాల కోసం కమ్యూనిటీ హాల్ నిర్మాణం చేపట్టడంతో పాటు, మూత్రపిండాల వ్యాధిగ్రస్తులకు మెరుగైన వైద్య సేవలు అందించేందుకు డయాలసిస్ కేంద్రాన్ని ఏర్పాటు చేయాలని విజ్ఞప్తి చేశారు. 1/70, పెసా చట్టాలను పటిష్ఠంగా అమలు చేయాలి ఆదివాసీల హక్కుల పరిరక్షణకు 1/70 చట్టాన్ని పటిష్ఠంగా అమలు చేయాలని, పెసా చట్టం ప్రకారం గ్రామసభలకు కల్పించిన అధికారాలను సమర్థవంతంగా అమలు చేయాలని సొడె శ్రీరామ్ డిమాండ్ చేశారు. గిరిజన ప్రాంతాల్లో ప్రజా సమస్యలకు త్వరితగతిన పరిష్కారం లభించేలా ఐటీడీఏ ద్వారా సింగిల్ లైన్ అడ్మినిస్ట్రేషన్ విధానాన్ని అమలు చేయాలని ప్రభుత్వాన్ని కోరారు. ఆదివాసీ ప్రాంతాల్లో విద్య, వైద్యం, రవాణా వంటి మౌలిక సదుపాయాలను మెరుగుపరిచినప్పుడే సమగ్ర అభివృద్ధి సాధ్యమవుతుందని తెలిపారు. ప్రజాప్రతినిధులు, అధికారులు ప్రజల సమస్యలను గుర్తించి పరిష్కారానికి ప్రాధాన్యత ఇవ్వాలని కోరారు. కొమరం భీమ్ ఫౌండేషన్ ప్రధాన డిమాండ్లను ప్రభుత్వం సానుకూలంగా పరిశీలించి, ప్రజల అవసరాలను దృష్టిలో ఉంచుకొని త్వరితగతిన చర్యలు చేపట్టాలని సొడె శ్రీరామ్ విజ్ఞప్తి చేశారు. కొమరం భీమ్ ఆశయాల స్ఫూర్తితో ఆదివాసీల హక్కుల పరిరక్షణకు, మండల ప్రజల సమస్యల పరిష్కారానికి ఫౌండేషన్ నిరంతరం కృషి చేస్తుందని నాయకులు తెలిపారు. ఈ కార్యక్రమంలో అనంతారం సర్పంచ్ కొర్సా రమేష్, ఇర్పా రామారావు, మడి రవి, ఈసం నరసింహారావు, వాడే నరసింహారావు, బచ్చల మహేష్, బచ్చల అశోక్ కుమార్, సామాజిక సద్భావన ప్రముఖ్ రామిశెట్టి నాగేశ్వరరావు తదితరులు పాల్గొన్నారు.
Admin
తెలుగు వెలుగు టీవీ
మరిన్ని వార్తలు
Developed By :
