పండుగ సాయన్న పోరాట స్ఫూర్తి భావితరాలకు ఆదర్శం
తెలుగు వెలుగు టీవీ - వార్తలు / కొత్తగూడెం : పేద ప్రజల పక్షాన నిలిచి ఆధిపత్య వర్గాలపై పోరాడిన వీరుడు పండుగ సాయన్న : కలెక్టరేట్ పరిపాలనాధికారి అనంత రామకృష్ణ భద్రాద్రి కొత్తగూడెం జిల్లా కలెక్టరేట్లో గురువారం పండుగ సాయన్న జయంతి వేడుకలను ఘనంగా నిర్వహించారు. ఈ సందర్భంగా కలెక్టరేట్ పరిపాలనాధికారి అనంత రామకృష్ణ పండుగ సాయన్న చిత్రపటానికి పూలమాల వేసి, జ్యోతి ప్రజ్వలన చేసి కార్యక్రమాన్ని ప్రారంభించారు. అనంతరం పండుగ సాయన్న జీవిత విశేషాలను, ఆయన ప్రజాసేవను, పోరాట స్ఫూర్తిని స్మరించుకున్నారు. ఈ సందర్భంగా అనంత రామకృష్ణ మాట్లాడుతూ, పండుగ సాయన్న జీవితం, ఆయన పోరాట పటిమ, పేద ప్రజల పట్ల చూపిన ఆదరణ భావితరాలకు ఆదర్శప్రాయమని తెలిపారు. సమాజంలో అణగారిన వర్గాలు, పేద ప్రజలు ఎదుర్కొంటున్న అన్యాయాలు, అణచివేతలకు వ్యతిరేకంగా నిలిచి పోరాడిన వ్యక్తిగా పండుగ సాయన్నకు ప్రత్యేక గుర్తింపు ఉందని అన్నారు . ప్రజల కష్టాలను అర్థం చేసుకుని, వారి సంక్షేమం కోసం తన శక్తిని, సామర్థ్యాన్ని వినియోగించిన ఆయన జీవితం నేటి తరానికి స్ఫూర్తినిస్తుందని అన్నారు. మహబూబ్‌నగర్ సమీపంలోని నవాబ్‌పేట మండలం మేరుగోనిపల్లె గ్రామానికి చెందిన పండుగ సాయన్న చిన్ననాటి నుంచే గ్రామీణ క్రీడల్లో విశేష ప్రతిభ కనబరిచేవారని తెలిపారు. సుమారు 20 కిలోల గుండును ఒక చేత్తో అవలీలగా ఎత్తడంతో పాటు, ఎద్దుల బండిని సైతం ఒక చేత్తో ఎత్తి విసిరే అసాధారణ శారీరక సామర్థ్యం ఆయనకు ఉండేదని వివరించారు. శారీరక బలం, ధైర్యసాహసాలతో పాటు ప్రజల పట్ల సేవాభావం ఆయనలో ప్రత్యేకంగా ఉండేవని తెలిపారు . ఆ కాలంలో పేద ప్రజలు ఆకలి, పేదరికం, సామాజిక అణచివేతలతో ఇబ్బందులు ఎదుర్కొంటున్న పరిస్థితుల్లో పండుగ సాయన్న వారికి అండగా నిలిచారని తెలిపారు. ఆకలితో అలమటించే ప్రజలకు ఆహారం అందించేందుకు సంపన్నుల ఇళ్లలోని ధాన్యపు గోదాముల నుంచి ధాన్యాన్ని తీసుకువచ్చి పేదలకు పంచిపెట్టేవారని తెలిపారు . ప్రజలకు జరుగుతున్న అన్యాయాలను ప్రశ్నిస్తూ, దొరల ఆధిపత్యం, అరాచకాలకు వ్యతిరేకంగా పోరాటం సాగించారని వివరించారు. ఇందుకోసం తనకంటూ ఒక దళాన్ని ఏర్పాటు చేసుకుని, ఆయుధాలను సమకూర్చుకుని ప్రజల పక్షాన నిలిచారని తెలిపారు. చరిత్రలో ప్రజల కోసం పోరాడిన మహనీయుల జీవితాలను నేటి యువత తెలుసుకోవాల్సిన అవసరం ఉందని అన్నారు . సమాజంలో సమానత్వం, న్యాయం, మానవత్వం, సేవాభావం వంటి విలువలను పెంపొందించుకోవడానికి పండుగ సాయన్న జీవితం స్ఫూర్తిదాయకమని తెలిపారు. ఆయన ఆశయాలను స్మరించుకుంటూ, సమాజంలోని పేదలు, బలహీన వర్గాల అభ్యున్నతికి ప్రతి ఒక్కరూ తమ వంతు కృషి చేయాలని పిలుపునిచ్చారు. ఈ కార్యక్రమంలో వెనుకబడిన తరగతుల అభివృద్ధి శాఖ అధికారిని విజయలక్ష్మి, బీసీ కమ్యూనిటీ సంఘ నాయకులు సాప్పరి క్రాంతి, బండారి సాగర్, అక్కల మధు, అక్కల సీతారామయ్య, కె. పైడయ్య, ఊదర వెంకటస్వామి, శ్రీనివాస్, ఎ. రాంబాబు, పి. వినయ్, కె. సమ్మయ్య, ఎన్. యాకయ్య, ఎ. సోమయ్య, హారిక, ఉషారాణి, జి. సంధ్యారాణి, ముదరుకోళ్ళ కిషోర్ తదితరులు, కలెక్టరేట్ కార్యాలయ సిబ్బంది పాల్గొన్నారు.
Admin
తెలుగు వెలుగు టీవీ
మరిన్ని వార్తలు
Developed By :
