ఈవీఎంల గోడౌన్‌ను తనిఖీ చేసిన జిల్లా కలెక్టర్ అంకిత్
తెలుగు వెలుగు టీవీ - వార్తలు / కొత్తగూడెం : ఈవీఎంలు, వీవీప్యాట్ల భద్రతపై ప్రత్యేక దృష్టి గోడౌన్ భవనం, భద్రతా ఏర్పాట్లను పరిశీలించిన కలెక్టర్ సీసీ కెమెరాలు, ఫైర్ ఎక్స్‌టింగ్విషర్ల పనితీరుపై ఆరా గోడౌన్ భద్రత విషయంలో అప్రమత్తంగా ఉండాలి – జిల్లా కలెక్టర్ అంకిత్ ఎన్నికల నిర్వహణలో అత్యంత కీలకమైన ఎలక్ట్రానిక్ ఓటింగ్ యంత్రాలు (ఈవీఎంలు), వీవీప్యాట్ల భద్రత విషయంలో అధికారులు నిరంతరం అప్రమత్తంగా ఉండాలని జిల్లా కలెక్టర్ అంకిత్ సూచించారు. త్రైమాసిక తనిఖీలలో భాగంగా సోమవారం కొత్తగూడెం ఆర్డీఓ కార్యాలయం సమీపంలోని ఈవీఎం గోడౌన్‌ను జిల్లా కలెక్టర్ తనిఖీ చేశారు. ఈ సందర్భంగా ముందుగా గోడౌన్‌కు ఉన్న సీల్‌ను కలెక్టర్ పరిశీలించారు. అనంతరం రాజకీయ పార్టీల ప్రతినిధులు, సంబంధిత ఎన్నికల అధికారుల సమక్షంలో గోడౌన్‌ను తెరిపించి లోపలికి వెళ్లి ఈవీఎంలు, వీవీప్యాట్లు భద్రపరిచిన గదులను క్షుణ్ణంగా పరిశీలించారు. యంత్రాల భద్రత, గోడౌన్లో చేపడుతున్న భద్రతా ఏర్పాట్లను పరిశీలించిన అనంతరం గోడౌన్‌ను తిరిగి సీల్ చేయించారు. గోడౌన్ భవనాన్ని కూడా జిల్లా కలెక్టర్ క్షుణ్ణంగా పరిశీలించారు. భవనంలో ఎక్కడైనా లీకేజీలు ఉన్నాయా, భవనం పరిస్థితి సక్రమంగా ఉందా అనే అంశాలను పరిశీలించారు. అలాగే అగ్నిప్రమాదాల నివారణ కోసం ఏర్పాటు చేసిన ఫైర్ ఎక్స్‌టింగ్విషర్లు అందుబాటులో ఉన్నాయా, అవి సక్రమంగా పనిచేస్తున్నాయా అనే విషయాలను పరిశీలించారు. అత్యవసర పరిస్థితుల్లో ఎలాంటి ఇబ్బందులు తలెత్తకుండా అవసరమైన ముందస్తు జాగ్రత్త చర్యలు చేపట్టాలని సంబంధిత అధికారులను ఆదేశించారు. అనంతరం గోడౌన్లో ఏర్పాటు చేసిన సీసీ కెమెరాల నియంత్రణ గదిని జిల్లా కలెక్టర్ పరిశీలించారు. సీసీ కెమెరాలు నిరంతరం పనిచేస్తున్నాయా, గోడౌన్ పరిసర ప్రాంతాల్లో పూర్తి స్థాయిలో నిఘా కొనసాగుతున్నదా అనే విషయాలను పరిశీలించారు. గోడౌన్ భద్రత విషయంలో ఎటువంటి నిర్లక్ష్యానికి తావులేకుండా నిరంతరం అప్రమత్తంగా ఉండాలని అధికారులను ఆదేశించారు. అనుమతి లేకుండా ఎవరూ గోడౌన్‌లోకి ప్రవేశించకుండా కట్టుదిట్టమైన చర్యలు తీసుకోవాలని, గోడౌన్ పరిసరాలను పరిశుభ్రంగా ఉంచాలని కలెక్టర్ సూచించారు. ఈవీఎంలు, వీవీప్యాట్ల భద్రతకు సంబంధించి నిర్దేశిత నిబంధనలను తప్పనిసరిగా పాటించాలని, భద్రతా సిబ్బంది నిరంతరం అప్రమత్తంగా విధులు నిర్వహించాలని తెలిపారు. గోడౌన్ తనిఖీకి సంబంధించిన వివరాలను జిల్లా కలెక్టర్ తనిఖీ రిజిస్టర్‌లో నమోదు చేసి సంతకం చేశారు. ఈ తనిఖీ లో కొత్తగూడెం ఆర్టీవో మధు,ఎన్నికల సూపరింటెండెంట్ రంగ ప్రసాద్, కాంగ్రెస్ పార్టీ ప్రతినిధి లక్ష్మణ్ అగర్వాల్, వివిధ రాజకీయ పార్టీల ప్రతినిధులు, ఎన్నికల సిబ్బంది నవీన్, భద్రతా సిబ్బంది తదితరులు పాల్గొన్నారు
Admin
తెలుగు వెలుగు టీవీ
మరిన్ని వార్తలు
Developed By :
