రోడ్డు ప్రమాదాల నివారణకు సమన్వయంతో పటిష్ట చర్యలు చేపట్టాలి : డీఆర్వో పద్మావతి
తెలుగు వెలుగు టీవీ - వార్తలు / కొత్తగూడెం : హిట్‌ అండ్ రన్ కేసుల పరిష్కారంపై ప్రత్యేక దృష్టి సారించాలి. ప్రమాదాలు జరిగే ప్రాంతాలను గుర్తించి భద్రతా చర్యలు చేపట్టాలి.జిల్లాలో రోడ్డు ప్రమాదాల నివారణకు సంబంధిత శాఖల అధికారులు సమన్వయంతో పటిష్టమైన చర్యలు చేపట్టాలని జిల్లా రెవెన్యూ అధికారి పద్మావతి సూచించారు. రోడ్డు భద్రత, ప్రమాదాల నివారణ, హిట్‌ అండ్ రన్ కేసుల పరిష్కారం, ప్రమాదాలు జరిగే ప్రాంతాల్లో చేపట్టాల్సిన చర్యలపై సంబంధిత శాఖల అధికారులతో సమీక్ష నిర్వహించారు.జిల్లాలో 2026 జనవరి 1 నుంచి సెప్టెంబర్ 15 వరకు మొత్తం 370 రోడ్డు ప్రమాదాలు నమోదయ్యాయని, వీటిలో 164 ప్రమాదాలు ప్రాణాంతకమైనవిగా ఉన్నాయని తెలిపారు. ఈ ప్రమాదాల్లో 176 మంది మృతి చెందగా, 23 మంది తీవ్రంగా, 344 మంది స్వల్పంగా గాయపడినట్లు వివరించారు. నమోదైన 370 ప్రమాదాల్లో 369 కేసుల్లో ఎఫ్‌ఐఆర్‌లు నమోదు చేసి 99.4 శాతం కేసుల్లో చర్యలు చేపట్టినట్లు తెలిపారు.రహదారుల వారీగా ప్రమాదాల వివరాలను పరిశీలిస్తూ రాష్ట్ర రహదారులపై 79, ప్రధాన జిల్లా రహదారులపై 4, ఇతర జిల్లా రహదారులపై 32, జాతీయ రహదారులపై 67 ప్రమాదాలు జరిగినట్లు అధికారులు వివరించారు. ప్రమాదాలు అధికంగా జరుగుతున్న ప్రాంతాలను గుర్తించి వాటికి గల కారణాలను విశ్లేషించి, సంబంధిత రహదారి సంస్థల ద్వారా అవసరమైన భద్రతా చర్యలను వెంటనే చేపట్టాలని సూచించారు.రోడ్డు ప్రమాదాలు జరిగే ప్రాంతాలను గుర్తించి ప్రమాదాల నివారణకు అవసరమైన చర్యలను ప్రాధాన్యతతో చేపట్టాలని, ప్రమాదాలకు కారణమవుతున్న మలుపులు, బ్లాక్‌స్పాట్లు, రహదారి లోపాలను గుర్తించి సకాలంలో సరిచేయాలని అన్నారు. అవసరమైన ప్రాంతాల్లో హెచ్చరిక బోర్డులు, రోడ్ మార్కింగ్‌లు, వీధి దీపాలు ఏర్పాటు చేసి వాటి నిర్వహణపై ప్రత్యేక దృష్టి సారించాలని సూచించారు.హిట్‌ అండ్ రన్ కేసుల పరిష్కారంపై ప్రత్యేక దృష్టి సారించాలని, ప్రస్తుతం పెండింగ్లో ఉన్న 7 కేసులను సీసీ కెమెరాలు, సాంకేతిక ఆధారాలు, ఇతర సమాచారాన్ని వినియోగించి త్వరితగతిన ఛేదించేలా చర్యలు చేపట్టాలని తెలిపారు. ప్రతి ప్రాణాంతక ప్రమాదానికి సంబంధించి కారణాలను విశ్లేషించి, సంబంధిత రహదారి సంస్థలు మరియు రవాణా శాఖకు అవసరమైన సమాచారం అందించి పునరావృత ప్రమాదాలకు అవకాశం లేకుండా చర్యలు తీసుకోవాలని సూచించారు.పోలీస్, రవాణా, ఆర్‌అండ్‌బీ, పంచాయతీరాజ్‌, జాతీయ రహదారుల శాఖల అధికారులు పరస్పర సమన్వయంతో పనిచేస్తూ ప్రమాదాల నివారణకు నిరంతర పర్యవేక్షణ చేపట్టాలని డీఆర్వో పద్మావతి ఆదేశించారు. రహదారి భద్రతా ప్రమాణాలను పాటించేలా చర్యలు తీసుకోవడంతో పాటు, ప్రమాదాలపై విశ్లేషణ ఆధారంగా అవసరమైన శాశ్వత పరిష్కార చర్యలు చేపట్టాలని సూచించారు.ఈ సమీక్షలో జిల్లా రవాణా అధికారి భూషిత్‌ రెడ్డి, డీఆర్‌ఎం జి. బాలాజీ, డీహెచ్‌ఎంఓ తుకారాం రాతోడ్ , ఆర్‌అండ్‌బీ ఈఈ, ట్రాఫిక్ ఎస్ఐ, సీ సెక్షన్ సిబ్బంది సంబంధిత శాఖ అధికారులు, తదితరులు పాల్గొన్నారు.
Admin
తెలుగు వెలుగు టీవీ
మరిన్ని వార్తలు
Developed By :
