అర్హత లేనప్పుడు సర్వే ఎందుకు? అధికారులారా !ప్రజలను మభ్య పెట్టకండి!
తెలుగు వెలుగు టీవీ - వార్తలు / కొత్తగూడెం : కొత్తగూడెం (మున్సిపాలిటీ) ఇందిరమ్మ గృహాల మంజూరులో రిజిస్ట్రేషన్ పట్టా నిబంధనను సడలించాలని ,లేకుంటే రామవరం ప్రజల ఆశలపై అధికారులే నీళ్ళు చల్లినట్లు అవుతుందని మాజీ మున్సిపల్ ఫ్లోర్ లీడర్ మునగడప వెంకటేశ్వర్లు అధికారుల తీరును తప్పుపట్టారు. శనివారం స్థానిక నేతాజీ బస్తి లో జరిగిన సమావేశంలో ఆయన మాట్లాడుతూ గత ప్రభుత్వ హయాంలో గృహలక్ష్మి పథకం రామవరం ప్రాంతానికి వర్తించలేదని అప్పుడు కూడా ఇలాగే సర్వే చేసి రామవరం ప్రాంతం 1/70 చట్ట పరిధిలో ఉందని సింగరేణి యాజమాన్య పరిధిలో ఉందని అప్పుడు కూడా రామవరం ప్రాంత ప్రజల దరఖాస్తులను తిరస్కరించారని ఆయన ఆవేదన వ్యక్తం చేశారు. ఉమ్మడి ఆంధ్రప్రదేశ్లో అలనాటి ముఖ్యమంత్రి కీర్తిశేషులు వై యస్ రాజశేఖర్ రెడ్డి ప్రభుత్వంలో రామవరం ప్రాంతంలో సుమారు 18 వందల గృహాలు మంజూరు చేశారని, అప్పుడు లేని నిబంధన ఇప్పుడు అధికారులకు గుర్తొచ్చిందా! అని ప్రశ్నించారు ?ఇందిరమ్మ గృహాల సర్వే తో ప్రజల్లో సొంతగృహం స్వప్నం చిగురిస్తుంటే అధికారుల సర్వే నిబంధన మాత్రం వారి ఆశలపై నీళ్లు చల్లుతుందని ,సర్వేల పేరుతో ప్రజలను మభ్య పెట్టొద్దని ఆయన అధికారులను కోరారు. తక్షణమే రామవరం ప్రాంతానికి రిజిస్ట్రేషన్ పట్టా అనే నిబంధనను తొలగించి సాదా అగ్రిమెంట్ ను పరిగణలోకి తీసుకొని అర్హులైన పేదలందరికీ ఇందిరమ్మ గృహాలు మంజూరు చేయాలని ఉన్నత స్థాయి అధికారులకు ఆయన విజ్ఞప్తి చేశారు. ఈ సమావేశంలో నాయకులు తమ్మ సత్తి, రామ్ రాకేష్, కాటం రాజ్ గుమ్మడి శ్రీను, మార్తమ్మ ,లక్ష్మి తదితరులు పాల్గొన్నారు.
Admin
తెలుగు వెలుగు టీవీ
మరిన్ని వార్తలు
Developed By :
