మద్దతు ధరల పేరిట రైతులకు మోసం : ఏఐకేఎస్ రాష్ట్ర అధ్యక్షులు భాగం హేమంతరావు
తెలుగు వెలుగు టీవీ - వార్తలు / కొత్తగూడెం : సీతారామ సాగు జలాలు ఈ జిల్లా రైతుల హక్కు. కరువు పరిస్థితుల్లో నష్టపోయిన రైతులకు పరిహారం చెల్లించాలి. రైతు సమస్యలపై పోరాటాలు ఉధృతం చేస్తాం. ఏఐకేఎస్ రాష్ట్ర అధ్యక్షులు భాగం హేమంతరావు. కేంద్ర ప్రభుత్వం ప్రకటించిన మద్దతు ధరలతో రైతులకు తీవ్ర నష్టం వాటిల్లుతోందని, మద్దతు ధరల పేరిట రైతాంగాన్ని నిలువునా మోసం చేస్తున్నారని ఏఐకేఎస్ రాష్ట్ర అధ్యక్షులు భాగం హేమంతరావు విమర్శించారు. తెలంగాణ రాష్ట్ర రైతు సంఘం (ఏఐకేఎస్) భద్రాద్రి కొత్తగూడెం జిల్లా విస్తృత కౌన్సిల్ సమావేశం బుధవారం పాల్వంచలోని సి.ఆర్. భవన్లో నిర్వహించారు. ఈ సమావేశానికి ఆయన ముఖ్యఅతిథిగా హాజరై మాట్లాడారు. కేంద్ర, రాష్ట్ర ప్రభుత్వాల రైతు వ్యతిరేక విధానాల వల్ల వ్యవసాయ రంగం తీవ్ర సంక్షోభంలో కూరుకుపోయిందని ఆవేదన వ్యక్తం చేశారు. సీతారామ ప్రాజెక్టు వల్ల ఈ ప్రాంత రైతులకు తీవ్ర అన్యాయం జరుగుతోందని, ప్రాజెక్టు ద్వారా స్థానిక ఆయకట్టుకు రావాల్సిన సాగునీటి హక్కులను కాలరాస్తున్నారని మండిపడ్డారు. కరువు పరిస్థితులు నెలకొన్న నేపథ్యంలో పంట నష్టపోయిన అన్నదాతలకు తక్షణమే నష్టపరిహారం చెల్లించి ఆదుకోవాలని డిమాండ్ చేశారు. అర్హులైన ప్రతి రైతుకూ ఎలాంటి కోతలు లేకుండా రైతు భరోసా సాయాన్ని విడుదల చేయడంతో పాటు చివరి ఆయకట్టు వరకు సీతారామ ప్రాజెక్టు ద్వారా నిరంతర సాగునీరు అందించాలని కోరారు. పాలకుల నిర్లక్ష్య వైఖరిపై రాజీలేని పోరాటాలు సాగించాల్సిన బాధ్యత మనపై ఉందని, రైతు హక్కుల సాధనకు గ్రామస్థాయిలో సంఘాన్ని బలోపేతం చేసి ఐక్య ఉద్యమాలను ఉధృతం చేయాలని ఆయన పిలుపునిచ్చారు. ఈ సమావేశంలో ఏఐకేఎస్ జిల్లా కార్యదర్శి ముత్యాల విశ్వనాథం, కల్లూరి వెంకటేశ్వర్లు, చండ్ర నరేంద్ర కుమార్, తాటి వెంకటేశ్వర్లు, వీసంశెట్టి పూర్ణచంద్రరావు, వాడే లక్ష్మి, ys గిరి, కుమారి హనుమంతరావు, నరాటి రమేష్, చర్ప నాగేశ్వరరావు, కమటం సురేష్, కొంగర అప్పారావు, రంజిత్, శ్రీను తదితరులు పాల్గొన్నారు.
Admin
తెలుగు వెలుగు టీవీ
మరిన్ని వార్తలు
Developed By :
