ఉద్యోగులతో రాజ్యాంగ ప్రతిజ్ఞ
తెలుగు వెలుగు టీవీ - వార్తలు / కొత్తగూడెం : భారత రాజ్యాంగ దినోత్సవాన్ని పురస్కరించుకుని బుధవారం భద్రాద్రి కొత్తగూడెం జిల్లా కలెక్టరేట్ లోని ఐడిఓసి కార్యాలయం సమావేశ మందిరంలో ప్రత్యేక సమావేశాన్ని నిర్వహించారు. అదనపు కలెక్టర్ డి. వేణుగోపాల్ అధ్యక్షత వహించిన కార్యక్రమానికి వివిధ శాఖల అధికారులు, సిబ్బంది హాజరయ్యారు. ఈ సందర్భంగా అదనపు కలెక్టర్ డి. వేణుగోపాల్ మాట్లాడుతూ భారత రాజ్యాంగ నిర్మాత డాక్టర్ బి. ఆర్. అంబేద్కర్ సేవలను స్మరించుకున్నారు. పౌర హక్కులు, కర్తవ్యాలు, ప్రజాస్వామ్య బలోపేతానికి రాజ్యాంగం కలిగిన ప్రాధాన్యతను వివరించారు. రాజ్యాంగ పరిరక్షణ, దేశ అభివృద్ధికి ప్రతి ఉద్యోగి నిబద్ధతతో పనిచేయాలని సూచించారు. రాజ్యాంగ స్ఫూర్తిని గౌరవిస్తూ ప్రజాసేవలో నిజాయితీ, కర్తవ్యనిబద్ధత అవసరమని అన్నారు. అనంతరం భారత రాజ్యాంగ దినోత్సవ ప్రతిజ్ఞను అధికారులు చదివి వినిపించారు. భారత రాజ్యాంగ దినోత్సవ ప్రతిజ్ఞ : “భారత ప్రజలమైన మేము, భారతదేశాన్ని సర్వసత్తాక సామ్యవాద లౌకిక ప్రజాస్వామ్య గణతంత్ర రాజ్యంగా నిర్మించుకొని, పౌరులందరికీ సామాజిక, ఆర్థిక, రాజకీయ న్యాయం కల్పించాలని; ఆలోచన, భావప్రకటన, విశ్వాసం, ధర్మం, ఆరాధనల స్వేచ్ఛను అందించాలని; అవకాశాలలో సమానత్వాన్ని చేర్చాలని; వ్యక్తిత్వ గౌరవాన్ని, జాతీయ సమైక్యతను కాపాడుతూ సౌభ్రాతృత్వాన్ని పెంపొందించాలని సంకల్పిస్తున్నాము. 1949 నవంబర్ 26న రాజ్యాంగ పరిషత్ ఆమోదించిన ఈ రాజ్యాంగాన్ని మేము స్వీకరించి, అమలు చేయడానికి మాకు మేమే కట్టుబడి ఉంటామని ప్రమాణం చేస్తున్నాము.” అని అధికారులు, సిబ్బంది ప్రతిజ్ఞ చేశారు. ఈ కార్యక్రమంలో సిపిఓ సంజీవరావు, కలెక్టరేట్ ఏఓ అనంత రామకృష్ణ, ఉపాధి కల్పన అధికారి కే. శ్రీరామ్, భూగర్భ జల శాఖ అధికారి రమేష్, ఇంటర్మీడియట్ అధికారి వెంకటేశ్వరరావు తదితరులు పాల్గొన్నారు.
Admin
తెలుగు వెలుగు టీవీ
మరిన్ని వార్తలు
Developed By :
