బస్సు, కాగడా గుర్తులకు ఓటెయ్యండి.కొత్తగూడెం ఎమ్మెల్యే కూనంనేని సాంబశివరావు.
తెలుగు వెలుగు టీవీ - వార్తలు / కొత్తగూడెం : బస్సు, కాగడా గుర్తులకు ఓటెయ్యండి. కార్మిక సంక్షేమానికి భరోసా ఈయూ, ఎన్ఎంయూ.ఎర్రజెండా అండతోనే సమస్యల పరిష్కారం.ఓటుతో కార్మిక ఐక్యతను చాటిచెప్పాలి. కొత్తగూడెం ఎమ్మెల్యే కూనంనేని సాంబశివరావు. టీజీఎస్ఆర్టీసీ గుర్తింపు సంఘం ఎన్నికల్లో బస్సు, కాగడా గుర్తులకు ఓటు వేసి భారీ మెజారిటీతో గెలిపించాలని సిపిఐ రాష్ట్ర కార్యదర్శి, కొత్తగూడెం ఎమ్మెల్యే కూనంనేని సాంబశివరావు పిలుపునిచ్చారు. త్వరలో జరగనున్న గుర్తింపు సంఘం ఎన్నికల ప్రచారంలో భాగంగా మంగళవారం భద్రాద్రి కొత్తగూడెం జిల్లా కేంద్రంలోని కొత్తగూడెం ఆర్టీసీ డిపో ఎదుట గేట్ మీటింగ్ నిర్వహించారు. ఈ కార్యక్రమానికి ఆయన ముఖ్య అతిథిగా హాజరై కార్మికులను ఉద్దేశించి ఉత్సాహభరితంగా ప్రసంగించారు. ఆర్టీసీ ఎంప్లాయిస్ యూనియన్‌కు సుదీర్ఘ పోరాట చరిత్ర ఉందని, ఎన్నో త్యాగాలు చేసి కార్మికులకు అనేక హక్కులు, విజయాలు సాధించిపెట్టిన ఘనత ఎర్రజెండాకే దక్కుతుందని కొనియాడారు. సంస్థను నమ్ముకుని నిరంతరం అహర్నిశలు శ్రమిస్తున్న కార్మికులు, ఉద్యోగులు ప్రస్తుతం ఎదుర్కొంటున్న సమస్యల పరిష్కారానికి ఐక్య పోరాటాలే శరణ్యమన్నారు. రాబోయే 9వ తేదీన జరగనున్న గుర్తింపు సంఘం ఎన్నికల్లో ఆర్టీసీ ఎంప్లాయిస్ యూనియన్, నేషనల్ మజ్దూర్ యూనియన్లు కలిసి ఉమ్మడిగా బరిలోకి దిగుతున్నాయని తెలిపారు. కార్మిక పక్షాన నిలిచే ఈ కూటమిని తిరుగులేని మెజారిటీతో గెలిపించుకోవాలని విజ్ఞప్తి చేశారు. రాష్ట్ర స్థాయి గుర్తింపు సంఘానికి క్లాజ్-3 కింద పోటీ చేస్తున్న ఎంప్లాయిస్ యూనియన్ 'బస్సు' గుర్తుపై ఓటు వేయాలని కోరారు. అలాగే ఖమ్మం రీజియన్ స్థాయిలో క్లాజ్-6 కింద బరిలో ఉన్న నేషనల్ మజ్దూర్ యూనియన్ 'కాగడా' గుర్తుపై ఓటు వేసి విజయదుందుభి మోగించాలని పిలుపునిచ్చారు. కార్మికుల న్యాయమైన డిమాండ్ల సాధన కోసం నిరంతరం పోరాడే శక్తులకు అండగా నిలవాలని ఆయన కోరారు. సమావేశంలో సిపిఐ జిల్లా కార్యదర్శి ఎస్ కె సాబీర్ పాషా, ఎంప్లాయిస్ యూనియన్ రాష్ట్ర నాయకులు కందుల భాస్కర్, నాయకులు కంచర్ల జమలయ్య, నేరెళ్ల రమేష్, ఈయూ, ఎన్ఎంయూ రాష్ట్ర, జిల్లా నాయకులూ ఎస్ బాబు, మౌలానా, థామస్ రెడ్డి, పిల్లి రమేష్, టివి ప్రసాద్, ఎస్ డి నజీర్, ఆర్ యెన్ సింగ్, హరివర్మ, జిసి శేఖర్, ఖాజామొహినుద్దీన్, జి రాజు, రేణుకాదేవి, రాధాదేవి, సంధ్య తదితరులు పాల్గొన్నారు.
Admin
తెలుగు వెలుగు టీవీ
మరిన్ని వార్తలు
Developed By :
