కండక్టర్ ప్రవళిక మృతి బాధాకరం: కుటుంబానికి కోటి రూపాయల బీమా, ఉద్యోగం, ఇందిరమ్మ ఇల్లు.మంత్రి పొన్నం ప్రభాకర్.
తెలుగు వెలుగు టీవీ - వార్తలు / కొత్తగూడెం : కండక్టర్ ప్రవళిక మృతి బాధాకరం: కుటుంబానికి కోటి రూపాయల బీమా, ఉద్యోగం, ఇందిరమ్మ ఇల్లు.. మంత్రి పొన్నం ప్రభాకర్ ప్రకటన. విధి నిర్వహణలో ఉంటూ దురదృష్టవశాత్తూ ప్రాణాలు కోల్పోయిన ఆర్టీసీ కండక్టర్ ప్రవళిక మృతి పట్ల రవాణా శాఖ మంత్రి పొన్నం ప్రభాకర్ తీవ్ర దిగ్భ్రాంతి వ్యక్తం చేశారు. ఉస్మానియా ఆసుపత్రి మార్చురీ వద్ద ప్రవళిక పార్థివదేహానికి మంత్రి పొన్నం ప్రభాకర్, ఆర్టీసీ ఎండీ నాగిరెడ్డి నివాళులర్పించారు. అనంతరం ప్రవళిక తల్లిని పరామర్శించి, ఆర్టీసీ కుటుంబం ఎల్లప్పుడూ వారికి అండగా ఉంటుందని భరోసా ఇచ్చారు.ఈ సందర్భంగా మంత్రి పొన్నం ప్రభాకర్ మాట్లాడుతూ.. ముఖ్యమంత్రి రేవంత్ రెడ్డి ఆదేశాల మేరకు బాధిత కుటుంబానికి ప్రభుత్వం తరఫున అన్ని విధాలా న్యాయం చేస్తామని ప్రకటించారు. ప్రవళిక తల్లికి ప్రభుత్వ ఉద్యోగం, ఇందిరమ్మ ఇల్లు కేటాయించడంతో పాటు ప్రభుత్వం & ఆర్టీసీ తరఫున ₹10 లక్షల ఎక్స్ గ్రేషియా అందిస్తామన్నారు. అలాగే ఆర్టీసీ తీసుకున్న ప్రత్యేక నిర్ణయం వల్ల బ్యాంక్ ప్రమాద బీమా కింద ఆ కుటుంబానికి ₹1 కోటి రూపాయల పరిహారం అందనుందని స్పష్టం చేశారు. ఆర్థికంగా అండగా నిలిచినా, కుటుంబ సభ్యురాలిని కోల్పోయిన లోటును భర్తీ చేయలేమని ఆయన ఆవేదన వ్యక్తం చేశారు.చట్టాన్ని చేతుల్లోకి తీసుకుంటే కఠిన చర్యలు:ప్రమాదం జరిగిన వెంటనే స్పందించి మెరుగైన వైద్యం అందించే ప్రయత్నం చేసినా ఫలితం లేకుండా పోయిందని మంత్రి తెలిపారు. ఈ ఘటనకు కారణమైన నిందితుడిపై గతంలో నమోదైన హత్యాయత్నం కేసును ఇప్పుడు 'హత్య కేసు'గా మార్చి, కఠిన చట్టపరమైన చర్యలు తీసుకుంటామని హెచ్చరించారు. ఎవరూ కూడా చట్టాన్ని చేతుల్లోకి తీసుకోకూడదని, ప్రయాణికులకు సిబ్బంది వల్ల ఏదైనా ఇబ్బంది కలిగితే ఉన్నతాధికారులకు ఫిర్యాదు చేయాలే తప్ప దాడులకు పాల్పడటం సరికాదని హితవు పలికారు.ప్రజాపాలన ప్రభుత్వం కార్మికుల సంక్షేమానికి కట్టుబడి ఉందని, పెండింగ్ సమస్యలన్నింటినీ పరిష్కరిస్తూ వారి భద్రతకు ప్రథమ ప్రాధాన్యం ఇస్తున్నామని మంత్రి పొన్నం ప్రభాకర్ పునరుద్ఘాటించారు.
Admin
తెలుగు వెలుగు టీవీ
మరిన్ని వార్తలు
Developed By :
